Stories

गुबरीला को महल

webadmin — Tue, 06 Oct 2020 12:48:17 +0000

गुबरीला को महल webadmin Tue, 10/06/2020 - 18:18

एक दिन गुबरीला नै बडो सो पोठो दिख्यो। बो बिकी परख करी अर आपगै भायला नै ईकै बारा म बतायो। बै सगळा बी पोठा नै देख्यो तो बै बिमै एक नगर बसाबा को परण कर्यो। कई दिना तांई बी पोठा म बेगार करबा कै पाछै बै एक बडी नगरी बणाई। बै आपगी सुफलता सूं राजी हो’र बी पोठा की खोज करबाळै गुबरीला नै ई नगरी को पेलो बादस्या बणा दियो। आपगै बादस्या कै मान म बै एक जोरदार परेड को कारयकरम राख्यो। जद बांकी परेड पूरी तरियां जोस म चालरी ही बी बखत एक हाथी बी पोठै की नगरी कै कन सूं जार्यो हो। बो पोठै नै देखता ई आपगो पग ठा लियो जिसूं बिको पग पोठै पै टिकणा सूं सुगलो नै हो ज्याय। जद बादस्या गुबरीलो आ देखी जणा बो आपै सूं बारै होगो अर झाळ म हाथी सूं बोल्यो, ‘अरै ओय, के तेरै म राजसता की ओर सूं कोई मान कोनी है? तू जाणै कोनी के तेरो अंय्या पग नै ठाणो मेरी कत्ती बडी बेजती है? पग तळै टेक’र तावळो सो माफी मांग बरना तनै सजा दी जासी!’ हाथी तळै देख’र बोल्यो, ‘माफ करो म्हाराज, मै मेरै पाप क्ले दया की भीख मांगू हूं। अत्तो खैर हाथी मान दिखातो होयो पोठै पै होळे सी आपगो पग टेक दियो।

लूकती अर कागलो

webadmin — Tue, 06 Oct 2020 11:52:36 +0000

लूकती अर कागलो webadmin Tue, 10/06/2020 - 17:22

भोत पुराणी बात है। एक कागलो खाणै की खोज म अठिन-बठिन हांडर्‌यो हो, पण बिकै हात क्यूंई कोनी लाग्यो। बो आखतो हो’र एक बोजा पै जा’र बेठगो। अरै वा! भाग होवै तो अंय्या को - बिनै एक थाळी मांय पनीर को बटको दिख्यो। बो थाळी कै कन गयो अर बिनै आपगी चूंच सूं ठा लियो अर उडबा लाग्यो। बोळा सारा कागला बिकै गेल उडबा लाग्या। बै बी पनीर नै बिकनै सूं खोसणो चावा हा। बो सै नै चकमो देबा म सुफल होगो अर एक बोजा की डाळी पै जा’र बैठगो। बठिनै कठे सूं एक लूकती बठी की जारी ही। लूकती कागलै की चूंच मांय पनीर देख्यो तो बिकै मूं म पाणी आगो। बा तावळी ई कागलै सूं बिको पनीर आपगै कब्जा म लेणै की योजना बणाई अर बा कागलै कानी देखी अर बोली – “अरै भाई कागला, तू कत्तो सरूप है।” “मै मेरो अत्तो-पत्तो तनै बताद्‍यूं– मै एक भोळी-ढाळी लूकती हूं। मेरी भायलियां मन बतायो है कि तेरी उवाज म एक गजब की मिठास है। के आ बात सई है?” कागलो आ सुण’र हेरान होगो। आज ताणी तो कोई बी बिकी उवाज की तारीफ कोनी करी। पण बो चुप रहयो। “भाई कागला, तेरी मीठी उवाज म के तू मेरै क्ले एक गीत कोनी गा सकै है, सुणावो नै भाया।” पण अब ताणी बो चुप हो। लूकती फेर बोली, “के तू तेरी लाडली भाण की अत्ती सी मनस्या बी पूरी कोनी कर सकै है?” “तू कत्तो फूटरो है, तेरै पांखड़ा को तो खैणो ई के है? मेरै क्ले एक गीत गा नै भाया।” कागलो बिकै फंक्या म आगो। बो आपगी चूंच खोली अर लाग्यो कांव-कांव करबा। अरै, ओ के, पनीर बिकी चूंच सूं निकळ’र जमीन पै पड़गी। लूकती झट देणी बिनै ठा लियो अर खागी। पण जद ताणी कागलै कै समज म आती कि के होयो, लूकती बठे सूं चाल पड़ी। कागलो आपगो सो मूं ले’र रहगो।

सीख:- जणा ई तो खैयो है कि चापलूसा सूं बचो, आंको बिसवास कोनी करबो चाये।

एक तांती ऊं दूसरी तांती

webadmin — Tue, 06 Oct 2020 11:51:21 +0000

एक तांती ऊं दूसरी तांती webadmin Tue, 10/06/2020 - 17:21

एक धनमान मिनख एक बडै संत नै क्यूं लिख’र देबा क्ले खैयो, जखो बिकै अर बिकै कुणबा क्ले एक तांती सूं दूसरी तांती क्ले धन अर सुख नै बढाबाळो होवै। संत एक कागद पै लिख्यो, ‘बाप मरै है, बेटो मरै है, पोतो मरै है।’ आ देख’र धनमान मिनख नै भोत झाळ आयी। बो बोल्यो, ‘मै थ्हानै मेरै कुणबा की खुसाली क्ले किमी लिखबा क्ले खैयो हो। अंय्या को सुगलो मजाक मेरै सागै कंय्या कर सको हो?’ संत बोल्या ‘ओ कोई मजाक कोनी।’ जे थ्हारो बेटो थ्हारै सामै मर ज्याय जणा थ्हानै भोत दुख होवै है। अंय्या ई थ्हारो पोतो थ्हारै सामै मर ज्याय जणा थ्हानै अर थ्‍हारै बेटा नै भोत दुख होवै। जखो बी मै लिख्यो है, जे बंय्या ई एक तांती सूं दूसरी तांती म थ्हारै कुणबा मांय होतो जाय जणा थ्हारै कुणबा मांय सई सुख अर धन कायम रह सकै है। ओ ई जीवन को नेम है।

बिना कार को बोजो

webadmin — Tue, 06 Oct 2020 11:50:00 +0000

बिना कार को बोजो webadmin Tue, 10/06/2020 - 17:20

एक दिन एक मिनख संत रामदास सूं बोल्यो, ‘मेरै घरां की गुवाड़ी म एक भोत बडो बोजो है, जखो दरमई कार को कोनी है। बिकी पेडी अत्ती कल्डी अर किसी सूं भरेड़ी है कि बिनै कोई लकड़ी काटबाळो अर खातोड़ बी कोनी काट सकै। बिका डाळा बी अत्ता मुड़ेड़ा है कि बासूं राछ का बंडा बी कोनी बणाया जा सकै। अंय्या का बोजा होणै सूं बी के नफो?’ रामदास कह्‌यो, ‘के तू ननी म उछळबाळी मछियां नै कोनी देखी? बै भोत छोटी अर चंचळ होवै है। पाणी कै ऊपर उडबाळा कीड़ा नै देखता ई बै लपक की बानै आपगो सिकार बणा लेवै है, पण अंय्या की मछी बोळा दिना ताणी जिंदी कोनी रह है। या तो बै जाळ म या फेर दूसरी मछियां को सिकार बण ज्याय है। बठिन दूसरै कानी याक कत्तो बडो अर बिना कार को जिनावर होवै है। बो नै तो खेत मांय कार करै अर ओर नै कोई कार सई ढंग सूं कर सकै है, पण याक भोत लम्बो जीवन जीवै है। तेरो बोजो बेकार होणै सूं ई अत्ता दिना ताणी खड़्‌यो है। बिकी डाळी कै तळै बेठ’र बिको ध्यान कर्‌या कर।

सीख:- लाम्बो जीवन जीणै सूं थोड़ो जीणो चोखो है, पण बिनै चोखा कामा क्ले जीवो।

भाठा पै बोजा

webadmin — Tue, 06 Oct 2020 11:43:51 +0000

भाठा पै बोजा webadmin Tue, 10/06/2020 - 17:13

गरमी कै दोफारी म एक कास्तगार बांस कै झुरमट मांय बणेड़ी संत की कुटिया कै कन डट्‌यो। बो संत नै एक बोजा कै तळै बेठ्‌या नै देख्‍यो। कास्तगार बोदरेसन म बोल्यो, ‘नाज की हालत भोत माड़ी है। मनै लागै है कि आबकै गुजारो कोनी होवै।’ संत सुण’र खैयो, ‘तनै चाये कि तू भाठा नै पाणी दे।’ कास्तगार ई बात को मतबल संत नै पुछ्‌यो तो संत बिनै आ काह्‌णी सुणाई। एक कास्तगार कोई संत की कुटिया कै कनकी जार्‌यो हो। बो देख्यो कै संत बाल्टी म पाणी ले’र जाय है। कास्तगार बिनै पुछ्‌यो कै बै पाणी कठे ले’र जार्या है। संत कास्तगार नै बतायो कि मै भाठा नै पाणी देवूं हूं, जिसूं बापै एक दिन बोजा उगसी। कास्तगार नै ई बात पै भोत अचम्बो होयो अर बो मान देतो होयो झटपट ई बठे सूं हांसतो होयो चलगो। संत रोजिना भाठा नै पाणी देता रह्‌या। थोड़ा दिना पाछै भाठा पै सिंवाळ उग्याया। सिंवाळ म बीज आ’र पड़गा अर बै उगगा। मतबल ओ होयो कि भाठा पै बोजा उग्याया।

सीख:- बेगार करबा सूं कोई बी कार सोरो हो सकै।

हां सायद

webadmin — Tue, 06 Oct 2020 11:42:51 +0000

हां सायद webadmin Tue, 10/06/2020 - 17:12

कोई गांमगै मांय एक कास्तगार रहतो। बिकै कन एक घोड़ो हो। एक दिन बो घोड़ो आपगी जेवड़ी तुड़ा’र भाजगो। आ खबर सुण’र आस-पड़ोस का मिनख बिनै दिलासो देबा आया। सगळा बोल्या, ‘ओ तो भोत बुरो होयो।’ कास्तगार जुबाब दियो, ‘हां सायद।’ आगलै दिन कास्तगार को घोड़ो ओटो आग्यो अर आपगै सागै तीन जंगली घोड़ा बी ल्यायो। कास्तगार कै घरां पड़ोसी ओजूं आया अर सगळा आपगी खुसी बताई। बांकी बात सुण’र कास्तगार बोल्यो, ‘हां सायद।’ दूसरै दिन कास्तगार को लाडलो छोरो जंगली घोड़ा की सुवारी करबा की कोसिस करो हो जणा बो तळै पड़गो जिसूं बिकी टांग टूटगी। कास्तगार का पड़ोसी बिकै घरां सोक करबा नै आया। कास्तगार बांकी बातां को जुबाब दियो, ‘हां सायद।’ आगलै दिन सेना का अपसर आया अर गांमगै सगळा जुवान छोरा नै जोरामरदी फोज म भरती करबा क्ले लेगा। कास्तगार कै छोरा की टांग टूटणा सूं बो जाणा सै बचगो। पड़ोसी कास्तगार नै ई बात क्ले बधाई देबा आया। कास्तगार बस अत्तो ई खैयो, ‘हां सायद।’

बस सायकल चलावूं

webadmin — Tue, 06 Oct 2020 11:41:53 +0000

बस सायकल चलावूं webadmin Tue, 10/06/2020 - 17:11

एक गुरुजी कै पांच चेला हा। एक दिन गुरुजी देख्‍यो कै पांचू बजार मांय सूं आप-आपगी सायकल पै ओटा आर्‌या हा। जद बै सायकल सूं तळै उतरगा, जणा गुरुजी बासूं पुछयो ‘थ्हे सगळा सायकल क्यूं चलावो हो?’ पेलो चेलो जुबाब दियो, ‘मेरी सायकल पै आलूवां को बोरो बनर्यो है। ई सूं मनै बोरा नै मेरी कड़तू पै कोनी सम्हाणो पड़ै। गुरुजी बिनै बोल्या, ‘तू तो भोत हुंस्यार है। जद तू बुडो हो ज्यासी जणा तन मेरी जंय्या लूळ’र कोन्या चालणो पड़सी।’ दूसरो चेलो जुबाब दियो, ‘मै सायकल चलाती बखत भोत बोजा अर खेत मांय खड़्‌या नाज नै देखूं हूं जखो मनै चोखो लागै है।’ गुरुजी बिनै बोल्या, ‘तू सदा तेरा दिदा नै खुला राखै अर जुग नै देखै है।’ तीसरो चेलो जुबाब दियो, ‘जद मै सायकल चलावूं बी बखत मंतरा को जाप करूं हूं।’ गुरुजी बिकी सराना करी, ‘तेरो मन कोई नुया पेड़ा की जंय्या रम्यो रहसी।’ चोथो चेलो जुबाब दियो, ‘सायकल चलाबा सूं सगळा जिनावरा नै एक ई समजू हूं।’ गुरुजी राजी हो’र बोल्या, ‘तू लड़ाई नै करबा कै गेला पै चालै है।’ पांचवो जुबाब दियो, ‘मै सायकल चलाबा क्ले सायकल चलावूं हूं।’ गुरुजी उठ’र पांचवै चेलै कै पगां कै कन बेठगा अर बोल्या, ‘मै थ्हारो चेलो हूं।’

सीख:- कोई बी कार करो तो बिनै बिकै मांय रम’र करबो चाये।

सचाई को गेलो

webadmin — Tue, 06 Oct 2020 11:40:53 +0000

सचाई को गेलो webadmin Tue, 10/06/2020 - 17:10

गुरुजी खेत की पाळ कन खड़्‌या हा। बी बखत ई बांको एक चेलो एक आफत ले’र आयो अर बोल्यो, ‘गुरुजी सचाई नै पाबा क्ले कुणसो गेलो चोखो है?’ गुरुजी बिनै पुछ्‌यो, ‘तू तेरै हात मांय कुणसी गुठी पेर्या है?’ चेल्यो बोल्यो ‘आ मेरै बाप की निसानी है जखी बै मरती बखत मनै दी ही।’ गुरुजी बोल्या, ‘मन दे।’ चेलो आपगी आंगळी सूं गुठी काड’र परेम सूं गुरुजी नै देदी। गुरुजी गुठी नै खेत कै बीच म नाज म बगा दी। चेलो अचरज सूं चिलायो अर बोल्यो, ‘गुरुजी थ्हे ओ के कर्‌यो, अब मनै सक्यूं छोड’र गुठी नै ढूंढणी पड़सी। बा मेरै क्ले अमोल है।’ गुरुजी बोल्या, ‘बा तो ल्हाद्‌यासी, पण बा मिलणा कै पाछै तनै तेरो जबाब बी मिल ज्यासी। सचाई को गेलो बी अंय्या को ई होवै है। बो दूसरै गेला सूं न्यारो अर अमोल होवै है।

सीख:- सचाई कै गेलै पै ई चालणो चाये।

सगळा की अमियत

webadmin — Tue, 06 Oct 2020 11:39:56 +0000

सगळा की अमियत webadmin Tue, 10/06/2020 - 17:09

बीड़ म रहबाळै कागलै कै कोई दुख कोनी हो। एक कागलो सुख चेन सूं जिर्‌यो हो। फेर एक दिन बो हंस नै देख्‍यो। धोळा हंस नै देख’र बो सोच्यो, ‘ओ हंस कत्तो धोळो है अर मै कंय्या को काळो हूं। ओ हंस जरूर ई जुग को सऊं खुस जिनावर है।’ कागलो आ बात हंस नै खैई जणा हंस बोल्यो, ‘ना बीरा अंय्या कोन्या है। भोत बखत ताणी मन बी लागो हो कि मै जुग को ससूं सरूप अर सुखी जिनावर हूं, पण एक दिन मै सुवा नै देख्यो, बिकै देई म दो भांत का रंग अनोखा हा, पण मेरकन तो खाली एक ई रंग है। अब मन लागै है कि सुवो ई जुग को ससूं सरूप अर सुखी जिनावर है।’ कागलो सुवा कन गयो अर सुवा सूं बोल्यो, ‘जद ताणी मै मोर कोनी देख्यो हो बठे ताणी मन मेरै सरूप होणै को गुमान हो।’ सुवो बोल्यो, ‘मोर जत्तो सरूप तो कोई कोनी हो सकै। मेरै दोरंगी पांख को मोर सूं मुकाबलो थोड़ी हो सकै।’ फेर कागलो मोर नै टोवण लाग्यो। बिनै मोर एक चिड़ीयाघर मांय ल्हाद्‌यो, बठे भोत सारा मिनख बिकै पींजरा कै बारै खड़्‌या बिकी सरूपाई नै सरावा हा। जद सारा मिनख बठे सूं चलग्या जणा कागलो मोर सूं पूछ्‌यो, ‘मोर भाई, तू कत्तो सरूप है! घणा सारा मिनख तनै देखबा क्ले आवै है। मन तो देखता ई आपगी निजर्‌यां दूसरै कानी कर लेवै है। मनै लागै है कि तू जुग को सैसूं सरूप अर खुस रहबाळो जिनावर है।’ मोर कागलै नै खैयो, ‘मनै बी ओई लागै है, पण मेरी सरूपाई ई मेरी बैरी बणगी। ई बजै सूं मै चिड़ियाघर मांय कैद हूं। अठे मै सगळा जिनावरां को मोको-मुवावनो करबा कै पा मनै बेरो पड़्‌यो कि तनै छोड’र बाकी सै जिनावर अठे कैद है। अब मनै लागै है कि मै मोर नै हो’र एक कागलो होतो तो बड़िया हो अर मै मनमरजी सूं कठे बी हांडतो-फिरतो।’ कागलै नै आपगी अमियत को ग्यान होगो।

सीख:- सगळा की न्यारी-न्यारी अमियत होवै है।

कागलो अर कास्तगार

webadmin — Tue, 06 Oct 2020 11:38:25 +0000

कागलो अर कास्तगार webadmin Tue, 10/06/2020 - 17:08

एक कागलो अर कास्तगार घणा जोरका भायला हा। कास्तगार रोजिना पेली कागला नै खाणो खुवातो पा खुद खातो। बठे सूं जाणै कै पाछै कागलो उड’र बरमाजी कै दरबार मांय पूंच ज्यातो अर दरबार कै बारै लागेड़ा बोजा पै बेठ’र बांकी सारी बात सुणतो। आथणकै बाई बात कागलो कास्तगार नै खैतो। एक दिन कागलो कास्तगार सूं खैयो, ‘आज बरमाजी खैर्या हा कै ई साल धरती पै मे कोन्या होवैगो, पण डूंगरा पै भोत मे होवैगो। क्यूं नै ई बर थ्हे डूंगरा पै खेती करो?’ कास्तगार डूंगरा पै खेती चालू करदी। आस-पड़ोस का मिनख बी कास्तगार को मजाक उडाबा लाग्या। बी साल भोत ठाडो काळ पड़्‌यो। कास्तगार एकलो अंय्या को मिनख हो, जखा कै भोत नाज होयो। देखता ई देखता कई साल बीतग्या। एक दिन कागलो कास्तगार नै खैयो, ‘बरमाजी खैर्या कै ई बर भोत मे होवैगो। नाज बी भोत होसी, पण सारै नाज नै कीड़ा-मकोड़ा खा ज्यासी। थ्हे पैली सूं ई भोत सारी चीड़ी लियावो, जिसूं बै कीड़ा-मकोड़ा नै खा ज्याय।’ कास्तगार बंय्या ई कर्यो जंय्या कागलो बानै बतायो। गेलकी बर कै तजुरबा नै देख’र मिनखा नै संका होयी। बै बिनै गोर सूं देखबा लाग्या, पण माणस ई बर कास्तगार पै हांस्या कोन्या। ई बर बी कास्तगार कै घरां भोत नाज होयो। ओ साल बी बीतग्यो। अबकी बर कागलो कास्तगार नै खैयो, ‘बरमाजी खैर्या कै नाज नै चूसा खा ज्यासी। ईक्ले थ्हे भोत सारी बिलाई लियावो जिसूं बै चूसा नै खा ज्यासी।’ कास्तगार नै बिलायां ल्याता देख सगळा मिनख बिकै सागै हो लिया। ई बर बै कास्तगार की बात मान ली अर ई साल गांमगै मिनखा कै बी भोत नाज होयो।

सीख:- कदे-कदे दूसरा नै करता देख बिकी जंय्या करणो बी नफा म रहवै।