ओ बीरै जेर्यो मेर्यो बरसलो मेव जामण जाया नानेरै भुनै सवावणी जी
ओ बीरा खींवै-खींवै भर्या हीं तळाव जामण जाया नाडा रै खाडा सै भर्या जी
ओ बीरा नाडा म झूरै रै जोटै जामण जाया खाडा म झूरै है पाडिया जी
ओ बीरा जेठूड़ा रो पैलो रै मासै जामण जाया इनर राजा धरराईयो जी
ओ बीरा साडूड़ा रो दूजा मासै जामण जाया हाळिया हळ जोड़िया जी
ओ बीरा सावणिया रो तीजो रै मासै जामण जाया खड़ी रै निनाणू बाजरो जी
ओ बीरा भादूड़ा रो चोथो मासै जामण जाया बेलड़िया फळ लागियो जी
ओ बीरा आसोजा रो पंचवो मासै जामण जाया लाखूं रै सीटा मूंगफळी चूळा छाईयो
ओ बीरा कात्य कळा रो छठवो मासै जामण जाया लाखूं सीटा रै बाजरो जी
ओ बीरा मंगसरिया रो सतवो रै मासै जामण जाया लूण-तूण खेती भेळी करां जी
ओ बीरा लूण-तूण भर्या हीं बखार्या जामण जाया ओबरिय रै कोठेला सै भर्या जी
ओ सायब अपणै अ सात बरस का दिया सायब राजा करो ए नै चितो ब्यावलो जी
ए गोरी थ्हे थ्हारा भाईड़ा नै न्यूत साथण ए गोरी म्हे म्हारा भाया नै न्यूतस्यां जी
ओ सायब थ्हारा तो भाईड़ा थ्हारै पासै सायब रा म्हारो तो पिवर दूर बसै जी
ए गोरी पिवरिया रो कायो ए दूर साधण चान-सूरज थ्हारै बीच बै बसै जी
ए गोरी ख्हवो तो रथड़ो जुड़ाय साधण गोरी ए ख्हवो ए तो स्यांड्यां भेज द्यां जी
सायब रथड़ो तो अजल्या-मझल्या जाय सायब राजा स्यांड्यां तो चलै उतावळी जी
ओ सायब आई मेरै बाप-दादा री भोम सायब राजा ज्यूं धण चलै ए उतावळी जी
ओ बीरा पोळिड़ा पोळै उघाड़ सायब राजा जामण जाया हम घर भीतर जाण द्यो जी
ए बाई जड़िया हीं सजन किंवाड़ जामण जाई ताळा ए जड़िया बीजळ सार का जी
ओ बीरा ताळो मेरो बांवो जी हात जामण जाया कूंची चिटली आंगळी जी
ओ बीरा खुलिया हीं सजन किंवाड़ जामण जाया ताळा रै खुलिया साळ का जी
ओ बीरा उबी ओबरड़ा री छाय जामण जाया कोई नै घालै बैसणो जी
ओ बीरा आई मेरी राधा देयी माय जामण जाया झट पट घालै बैसणो जी।
