एहे…गायां रोवै रै कानूड़ा कुण म्हारी सुध-बुध लेवै रै गायां रोवै रै [टेर]

एहे…जमना जी कै जळ म रै कान्हा मळ-मळ कै न्हुवातो रै
आजकाल का मिनख लठ सोटा सै धोवै रै गायां रोवै रै [1] टेर

एहे…गऊवां रो ग्वाळो बणकै हरी-हरी घास चरातो रै
मिलै पराळी सुखी तूड़ी आंख्या रोवै रै गायां रोवै रै [2] टेर

एहे…पणघट को रै स्याम बड़ो ही रसियो रै पणघट को [टेर]

एहे…गाछां की ओट छिप्यो रै मनमोहन
गोपिया नै रोज दिखावै तसियो रै पणघट को [1] टेर

एहे…सबर सखिया तो जळ भरण रै आई रे
मनमोहन म बांको मन बसियो रै पणघट को [2] टेर

एहे…कूदयो जमना म कन्हियो रसियो लेकै मुरली रै कूदयो जमना म [टेर]

एहे…कूद पड़्यो बनवारी जळ म ग्वाळा रोवै सारा रै
अरै कई ग्वाळा घर म भाज्या कई पुकारै रै कूदयो जमना म [1] टेर

एहे…रोवत-रोवत जसोदा रै जमना तट पर आई रै
अरै म्हानै छोड़ कर कठे गयो तू कंवर कन्हाई रै कूदयो जमना म [2] टेर

एहे…मुख मुरली बजाई रै कान्हा नन्द जी का रै मुख मुरली [टेर]

एहे…मुरली की आवाज म्हानै महलां म सुणिज्य रै
अरै महलां बेठी गोरड़ी मगन होय जाय मुख मुरली [1] टेर

एहे…मुरली की आवाज म्हानै बागा म सुणिज्य रै
अरै बागा बेठी कोयली मगन होय जाय मुख मुरली [2] टेर

एहे…रंग झीणो रै राठोड़ो थ्हारी महफिल को रै रंग झीणो रै [टेर]

एहे…केसरियो तो साफो राजा राठोड़ां कै सोवै रै
अरै भगवा तो सोवै भोळै साधां कै रै रंग झीणो रै [1] टेर

एहे…काना म गजमोति रै राजा राठोड़ां कै सोवै रै
अरै कुण्डल सोवै भोळै साधां कै रै रंग झीणो रै [2] टेर

एहे…राजा बली कै दरबार मची रै होळी रै राजा बली कै [टेर]

एहे…न्हाय धोय राजा चोकी ऊपर बेठ्‍यो जी
एहे…तिलक कर्यो रै केसर रोळी को रै [1] टेर

एहे…कै मण लाल गुलाल उड़त है…
हो… कै मण केसर किसतूरी रै राजा बली कै [2] टेर

एहे…नो मण लाल गुलाल उड़त है
हो…दस मण केसर किसतूरी रै राजा बली कै [3] टेर

एहे…धोळागड म रै राज तुम्हारो देबी ए धोळागड म [टेर]

एहे…कै गज ऊंचो ए देबी थ्हारो भवन देवरो
ए… कै गज ऊंडी ए थ्हारी नीवड़ली रै धोळागड म [1] टेर

एहे…नो गज ऊंचो ए थ्हारो भवन देवरो
दस गज ऊंडी ए थ्हारी नीवड़ली रै धोळागड म [2] टेर

एहे…मत मारो रे मोहन मेरै लग ज्यागी रै मत मारो रे…
मत मारो रे मोहन म्हारै लग ज्यासी रै मत मारो रै [टेर]

एहे…भर पिचकारी रै कान्हो घूंघट ऊपर मारी रै…
मुखड़ै की आब बिगाड़ी रसियो रे मत मारो रै [1] टेर

एहे…भर पिचकारी रै कान्हो गळपटियै पै मारी रै…
मोतिड़ै री आब बिगाड़ी रसियो रै मत मारो रै [2] टेर

एहे…स्याम बुलावै राधा बेगी आज्या बाग म रे स्याम बुलावै रे…
आज्या बाग म ए राधा आज्या होळी म ए स्याम बुलावा रे [टेर]

एहे…सरस्यूं फूल रही खेता म झुक-झुक झोला खावै रे…
अरै सांवरो जोवै बाटड़ली कद राधा आवै रे [1] टेर

एहे…कद आवलो भोजाईये राणो काजटियो ए कद आवलो [टेर]

एहे…चालो ए भोजाईये आपां पीपळ पूजण चालां ए…
बठे-बठे आवै राणो काजटियो ए कद आवलो [1] टेर

एहे…चालो ए भोजाईये आपां सोनिड़ै घर चालां ए…
हो…मादळियो घड़ावै राणो काजटियो कद आवलो  [2] टेर